ശബരിമലയില്‍ നിന്നു കുട്ടിയെ തട്ടിയെടുക്കാന്‍ ശ്രമം

Posted on: 23 Dec 2010

ആരോമല്‍

ശബരിമല: തീര്‍ഥാടകരുടെ തിരക്കു മുതലെടുത്ത് ശബരിമല സന്നിധാനത്തേക്കുള്ള വഴിയില്‍ നിന്ന് കുട്ടിയെ തട്ടിയെടുക്കാന്‍ ശ്രമം. ശബരിമലയിലേക്ക് വരികയായിരുന്ന ചേര്‍ത്തല പട്ടണക്കാട് കുറുപ്പശേരിയില്‍ പ്രസാദിന്റെ മകന്‍ ആരോമലിനെ (നാല്) ആണ് തട്ടിയെടുക്കാന്‍ ശ്രമം നടന്നത്.

പ്രസാദിന്റെ അമ്മ സുമതിയും ബന്ധു പ്രകാശനും ആണ് ആരോമലിന് ഒപ്പമുണ്ടായിരുന്നു. പതിനൊന്നരയോടെ മരക്കൂട്ടത്തെത്തിയ ഇവര്‍ ബാരിക്കേഡിനുള്ളിലൂടെ പോവുകയായിരുന്നു. അതിനിടെ പിന്നില്‍ നിന്നെത്തിയ മൂന്നംഗ സംഘം തന്റെ കൈയില്‍ നിന്ന് കുട്ടിയെ തട്ടിയെടുത്ത് ഓടുകയായിരുന്നുവെന്ന് പ്രസാദ് പറഞ്ഞു. ബഹളം വച്ചതിനെ തുടര്‍ന്ന് പോലീസ് ഉടന്‍ എല്ലായിടത്തേക്കും സന്ദേശം കൈമാറി.

പത്തു മിനിട്ടിനു ശേഷം സന്നിധാനത്തേക്കുള്ള വഴിയില്‍ പാറമടയ്ക്കു സമീപത്തു നിന്ന് കുട്ടിയെ ഉപേക്ഷിച്ച നിലയില്‍ കണ്ടെത്തി. സ്ഥലത്ത് പട്രോളിങ്ങിലുണ്ടായിരുന്ന ഉദ്യോഗസ്്ഥര്‍ കുട്ടിയെ സന്നിധാനം സ്‌റ്റേഷനില്‍ എത്തിച്ചു.

സ്വാമിമാരുടെ വേഷത്തിലെത്തിയ മൂന്നു പേരാണ് കുട്ടിയെ തട്ടിയെടുത്തത്. ഇവരെ കണ്ടാല്‍ തിരിച്ചറിയാനാകുമെന്നും പ്രസാദ് പറഞ്ഞു. പോലീസ് കേസെടുത്ത് അന്വേഷണം ആരംഭിച്ചു. മരക്കൂട്ടത്തിനും പാറമടയ്ക്കും ഭസ്മക്കുളത്തിനു പിന്നിലെ കാടുകളിലും ഇവര്‍ക്കായി തിരച്ചില്‍ നടത്തുന്നതായി പോലീസ് അറിയിച്ചു.

(mathrubhumi)

=============================================================